మీ పోలీస్ స్టేషన్ మీకు తెలియట్లేదా? – ఇలా తెలుసుకోండి! – CYBERABAD POLICE WEBSITE
నేరాలు, గొడవలు జరిగినప్పుడు ఠాణా ఏదో తెలియక తికమకపడుతున్న జనం – సైబరాబాద్ పోలీస్ అనే వెబ్సైట్ను అందుబాటులోకి తీసుకువచ్చిన సీపీ అవినాశ్ మహంతి.
Know Your Police Station In Hyderabad : హైదరాబాద్ నగరంలోని వివిధ ప్రాంతాలకు వెళ్లినప్పుడు అనూహ్యంగా అనుకోకుండా ఏదో ఒక నేర ఘటన జరుగుతుంది. వేధింపులు, గొడవ ఘటన ఏదైనా అత్యవసర పరిస్థితుల్లో స్థానికంగా ఉండే పోలీస్‌స్టేషన్‌ వెళ్దామంటే జ్యురిస్టిక్షన్‌ పరిధి ఏదో తెలియక కన్ఫ్యూజ్ అవుతుంటారు. ఒక పోలీస్ స్టేషన్కు బదులు ఇంకో పోలీస్ స్టేషన్కు వెళ్తే తమ పరిధి కాదని కొందరు పోలీసు సిబ్బంది వారికి చెప్పి అక్కడికి వెళ్లండని పంపిస్తుంటారు. ఈ తరహా సరిహద్దు సమస్యలకు పరిష్కారంగా సైబరాబాద్ పోలీసులు సరికొత్తగా ఆలోచించి వెబ్సైట్ను అందుబాటులోకి తీసుకు వచ్చాారు.
వారు ఏ పోలీస్‌స్టేషన్‌ పరిధిలో ఉన్నారో ఆన్లైన్లో తెలుసుకునేలా ఎలా వెళ్లాలో కూడా మార్గనిర్దేశం చేసే అత్యాధునిక వ్యవస్థను అందుబాటులోకి తెచ్చారు. సైబరాబాద్ పోలీస్ కమిషనర్‌ అవినాశ్ మహంతి ఐపీఎస్ ఆదేశాలతో కొన్నిరోజుల క్రితం ఈ సౌకర్యం వినియోగదారులకు అందుబాటులోకి వచ్చింది. పోలీస్‌స్టేషన్ల మధ్య సరిహద్దుల సమస్య లేకుండా ఇది వేగంగా పనిచేస్తుంది.
వెబ్‌సైట్‌లోకి ఎలా వెళ్లాలంటే..
- మొబైల్ ఫోన్‌లో సైబరాబాద్ పోలీస్ (cyberabadpolice.gov.in) వెబ్‌సైట్‌లోకి వెళ్లాలి.
- అనంతరం జ్యురిస్టిక్షన్‌ ఫైండర్‌ ఆప్షన్ మీద క్లిక్‌ చేయాలి.
- పోలీస్ జ్యురిస్డిక్షన్‌ ఫైండర్‌ పేరుతో మీకు ప్రేమ్ ప్రత్యక్షమవుతుంది. అందులోని ఫైండ్‌ మై పోలీస్‌స్టేషన్‌ ఆప్షన్ ఓపెన్ చేయాలి.
- ఇందుకు ఫోన్‌లో లొకేషన్‌ ఆప్షన్ ఆన్‌లో ఉండాలి. ఆన్‌లో లేకపోతే వెబ్‌సైట్‌ పర్మిషన్ కోరుతుంది.
- గూగుల్‌ మ్యాప్స్‌ ఆధారంగా మీరున్న పోలీస్‌స్టేషన్‌ పరిధి ఏంటో స్టేషన్ ఎంత దూరంలో ఉందో కచ్చితమైన సమాచారం మీ స్క్రీన్ మీద చూపిస్తుంది.
- డైరెక్షన్స్‌ మీద క్లిక్‌ చేస్తే సదరు పోలీస్ స్టేషన్కు ఎలా వెళ్లాలో ఏయే రూట్లు అందుబాటులో ఉన్నాయో కూడా చూపిస్తుంది.
ఆన్లైన్లో ఫిర్యాదులు : కొత్త పోలీస్ చట్టాల్లో భాగంగా జీరో ఎఫ్ఐఆర్ జులై 1నుంచి దేశవ్యాప్తంగా అమల్లోకి వచ్చింది. ఆన్‌లైన్‌లోనే పోలీసులకు కంప్లైంట్ చేయవచ్చు. ఈ కొత్త చట్టాల ప్రకారం పోలీస్ స్టేషన్కు వెళ్లనవసరం లేకుండానే ప్రజలకు ఆన్లైన్లో ఫిర్యాదు చేసే వీలు కలుగనుంది. తద్వారా తేలికగా, వేగంగా సమస్యను తెలియజేయడంతోపాటు పోలీసుల రెస్పాన్స్ను సులభతరం చేస్తుంది.
- ఏదైనా ఘటనకు సంబంధించిన సమాచారాన్ని ఏ పోలీస్ స్టేషన్‌కైనా ఆన్లైన్లో తెలియజేసే అవకాశం ఉంది.
- జీరో ఎఫ్ఐఆర్ ప్రకారం ఏ వ్యక్తి అయినా పోలీసుస్టేషన్‌ పరిధితో సంబంధం లేకుండా ఏ పోలీస్ స్టేషన్లోనైనా కంప్లైంట్ చేయవచ్చు.
- బాధితులతోపాటు నిందితులు కూడా ఎఫ్ఐఆర్ కాపీలను ఉచితంగా పొందే సౌకర్యం ఉంది. వీటితోపాటు పోలీస్ రిపోర్టు, ఛార్జిషీట్‌, స్టేట్‌మెంట్లు, ఇతర డాక్యుమెంట్లను 14 రోజుల్లోగా పోలీస్ స్టేషన్ నుంచి పొందవచ్చు.
- అరెస్టు సందర్భాల్లో బాధితుడు తమ సన్నిహితులు, బంధువులకు ఆ పరిస్థితిని తెలియజేసే హక్కు కూడా ఉంటుంది. తద్వారా తక్షణ సహాయం పొందేందుకు అవకాశం కలుగుతుంది.
- అరెస్టుకు సంబంధించిన వివరాలను స్థానిక పోలీస్ స్టేషన్‌తోపాటు జిల్లా పోలీస్ హెడ్‌ క్వార్టర్లలోనూ బహిరంగంగా తెలియజేసేలా ప్రదర్శిస్తారు. తద్వారా అరెస్టు సమాచారాన్ని బాధితుల కుటుంబీకులు, స్నేహితులు సులభంగా తెలుసుకునే వీలుంటుంది.
- కేసు, దర్యాప్తును పటిష్ఠంగా నిర్వహించేందుకు గాను తీవ్రమైన నేరాల్లో ఫోరెన్సిక్‌ నిపుణులు, పోలీసులతో తప్పనిసరిగా ఘటనా స్థలాన్ని పరిశీలించాల్సి ఉంటుంది. దీంతోపాటు సాక్ష్యాలను తారుమారు చేయడాన్ని నిరోధించేందుకు నేరం జరిగిన ప్రాంతంలో ఆధారాలను సేకరించే క్రమాన్ని తప్పనిసరిగా వీడియోగ్రఫీ చిత్రీకరించి భద్రపరచాలి.