ఈ యాప్​ ఉంటే చాలు – మీ ఊరి వివరాలు మీ చేతుల్లో!

కేంద్ర ప్రభుత్వం తీసుకొచ్చిన మేరీ పంచాయతీ యాప్‌ – గ్రామ పంచాయతీల ఆదాయం, ఖర్చుల వివరాలు తెలుసుకునే వీలు – ఇకపై పాలకులు సైతం తప్పులు చేయడానికి అవకాశం లేకుండా యాప్ డిజైన్​

Meri Panchayat App : గ్రామ పంచాయతీల్లో చేపట్టే అభివృద్ధి పనులను గ్రామస్థులు తెలుసుకునేందుకు కేంద్ర ప్రభుత్వం మేరీ పంచాయతీ(నా పంచాయతీ) అనే యాప్‌ను అందుబాటులోకి తెచ్చింది. ఈ యాప్​ ద్వారా గ్రామ పంచాయతీల ఆదాయం, ఖర్చుల వివరాలు తెలుసుకునేందుకు అవకాశం ఉంటుంది.

ప్రభుత్వాలు విడుదల చేసే నిధులను పాలకవర్గాలు, ప్రత్యేకాధికారులు ఎలా ఖర్చు చేస్తారనే సమాచారం ఇకపై పంచాయతీ కార్యాలయానికి వెళ్లకుండానే పరిశీలించవచ్చు. ఈ యాప్​ 2019 నుంచి మనుగడలో ఉంది. కాని దానికి సంబంధించిన సాంకేతిక కారణాలతో పూర్తిస్థాయిలో అందుబాటులోకి రాలేదు. కానీ ఇప్పుడు తాజాగా అన్ని గ్రామాల సమగ్ర సమాచారాన్ని ఈ యాప్​లోకి తీసుకొచ్చారు.

ఈ యాప్​లో వివరాల నమోదు సమయంలోనే జీపీఎస్​ ద్వారా గుర్తించే అవకాశం ఉంది. ఇతర చోట్ల పనులకు కేటాయించిన నిధులను వినియోగించినా తెలుసుకోవచ్చు. ఇలా చేయడం వల్ల పాలకులు సైతం తప్పులు చేయడానికి అవకాశం ఉండదు. అదికారులు తప్పులు నివేదికలు రూపొందిస్తే ప్రశ్నించడానికి వీలు ఉంటుంది.

యాప్‌పై అవగాహన : మేరీ పంచాయత్ యాప్​పై ప్రజలకు అవగాహన కల్పించడంలో అధికారులు నిర్లక్ష్యం వహిస్తున్నారు. గ్రామాల్లో చాలా వరకు గ్రామాల్లో చదువుకున్న యువతకు తప్ప మరొకరికి ఈ యాప్ ఉన్నట్లు తెలియదు.

• దీనిని స్మార్ట్​ఫోన్​లో ప్లే స్టోర్​కు వెళ్లి మేరీ పంచాయత్​ యాప్​ను డౌన్​లోడ్​ చేసుకోవాలి. ఆ తర్వాత లాగిన్​ కావాలి. వెంటనే ఆర్థిక సంవత్సరం, రాష్ట్రం, జిల్లా, మండలం, పంచాయతీ వివరాలు, పిన్​కోడ్​లు ఎంచుకోవాలి. అనంతరం గ్రామపంచాయతీ పూర్తి వివరాలు ఇందులో కనిపిస్తాయి.
• ఈ యాప్​ ద్వారా సర్పంచి, కార్యదర్శి, గ్రామ కమిటీలు, ఆస్తుల వివరాలన్నీ దీనిలో తెలుసుకోవచ్చు. కేంద్ర, రాష్ట్ర ప్రభుత్వాలు సంవత్సరం మంజూరు చేసే నిధులు, పనులు ఏ దశలో ఉన్నాయి, దీనికి ఎంత ఖర్చు చేశారన్న వివరాలూ నమోదై ఉంటాయి. నిధుల్లో సిబ్బంది వేతనాలు, ఇతర ఖర్చులు కూడా యాప్​లో నమోదు చేస్తారు. వచ్చే సంవత్సరంలో అంచనా వ్యయాల నమోదుతో పాటు గ్రామసభల వివరాలు సైతం అందుబాటులో ఉంటాయి.
• దీనిలో నిధుల వినియోగంలో ఎన్ని లోపాలున్నా, అక్రమాలు జరిగినా తెలుసుకోవడమే కాకుండా సంబంధిత అధికారులను ప్రశ్నించడానికి అవకాశం ఉంటుందని మునగాల ఎంపీడీవో రమేష్​ దీన్​దయాళ్​ తెలిపారు.

ఉపయోగాలు :

ఒకేసారి నమోదు :

• ఒకే రిజిస్ట్రేషన్‌తో ఏదైనా గ్రామ పంచాయతీ నుంచి సేవలు పొందవచ్చు

ఎన్నికైన ప్రతినిధులు :

ఎన్నికైన ప్రతినిధులు, పంచాయతీ అధికారులు, సభ్యుల సమాచారాన్ని యాక్సెస్ చేయడం, పారదర్శకతను ప్రోత్సహించడం

గ్రామ పంచాయతీ ప్రొఫైల్ :

• పంచాయతీ స్థాయి
• జనాభా డేటా, మౌలిక సదుపాయాలు సమాచారంతో కూడిన నిర్ణయం తీసుకోవడానికి సౌకర్యాలను పొందండి

పంచాయతీ ఆడిట్ స్థితి :

• పంచాయతీ ఆడిట్ స్థితిని అందిస్తుంది. అలాగే ఆర్థిక స్థితిని కూడా తెలియజేస్తుంది

పంచాయతీ బడ్జెట్ :

• పంచాయతీ బడ్జెట్ వివరాలు
• దాని కేటాయింపులు, ఆర్థిక వనరులు, ప్రాధాన్యతలపై సమాచారం అందిస్తాయి